ချစ်ခဲ့ရသော လုပ်ဖော်ကိုင်ဖက်များ (၂)

အတူတူလုပ်နေဆဲ လုပ်ဖော်ကိုင်ဖက်များ

အတူတူလုပ်နေတဲ့ အစ်မတွေ၊ အစ်ကိုတွေ၊ သူငယ်ချင်းတွေအကြောင်း မပြောခင် လုပ်နေတဲ့ အလုပ်ပတ်ဝန်းကျင်ကလေးကလည်း အတော်ချစ်စရာကောင်းကြောင်းလေးလည်း ကြွားလိုက်ချင်သေးတယ်။ တစ်ဦး အပေါ် တစ်ဦးမနာလိုခြင်းကင်းတဲ့ ဂရုစိုက်မှုများ၊ နားလည်မှုများ၊ စာနာမှုများ ဖြင့် ဖွဲ့နှောင်ထားတဲ့ လုပ်ငန်းခွင် သံယောဇဉ် ကြီးမားတဲ့သူများ ဖြစ်ပါတယ်။ နွေးထွေးတဲ့ လုပ်ငန်းခွင်လေးလို့လည်း ပြောနိုင်ပါတယ်။

ပထမဆုံးပြောရမယ့်သူက မကေ

မကေ ဆိုတာက အားလုံးထဲမှာ သွက်သွက်လက်လက်နဲ့ ချစ်စရာကောင်းတဲ့ အစ်မတစ်ယောက်ပေါ့။ သူ့ကို ချစ်မိတာက ကျွန်တော့်ကို သူများတွေနဲ့ မိတ်ဆက်ပေးရင် `သမီး ညီမလေးလေ´ လို့ အမြဲပြောပြီး ကျွန်တော့်ကို စာနာတတ်သူဖြစ်လို့ပါပဲ။ မိုင်နှုန်းမြင့်တဲ့ ကျွန်တော့်စိတ်အဟုန်ကို သိသိသာသာလေး လျော့ကျသွားအောင် ဘ၀ပေး ဥပမာလေးတွေနဲ့ သင်ကြားပေးတတ်ပါသေးတယ်။ ကျွန်တော်သူ့ဆီက သင်ယူဖြစ်ခဲ့တာလေးက `ရောင့်ရဲတတ်တဲ့ စိတ်´ လေးပါပဲ။ မကေကြောင့်ပဲ အချို့သော စိတ်ထားလေးတွေ ပြောင်းလဲနိုင်ခဲ့ပါတယ်။ အိမ်မှာ အကြီးဆုံးဖြစ်တဲ့ ကျွန်တော့်အတွက်တော့ အစ်မအရင်း တစ်ယောက် ကောက်ရသလိုပါပဲ။ အမျိုးသား အကျိုးစီးပွားရောက်မှ တော်ရတဲ့ အစ်မတစ်ယောက်ပါ။ မကေက ကျွန်တော့် လုပ်ပုံကိုင်ပုံတွေ မဟုတ်ရင် တော်တော်ကလေးဆူတတ်ပါတယ်။ ကျွန်တော်က မကေဆူမှာကိုတော့ ကြောက်ပါတယ်။ (ဟီး ဟီး)

မနိုင် - နေပုံထိုင်ပုံ အေးဆေးတည်ငြိမ်လွန်းတဲ့ အစ်မပါ။ စည်းစနစ်လည်း အရမ်းကြီးပါတယ်။ အထွေထွေ ဗဟုသုတနဲ့လည်း ပြည့်စုံပါတယ်။ ကျွန်တော့်ရဲ့ အဘိဓာန်တစ်အုပ်ဆိုလည်း မမှားပါဘူး။ သိချင်တာတွေရှိရင် သူ့ကိုပဲ ပြေးပြေးပြီး မေးမိပါတယ်။ မနိုင်ဆီက ကျွန်တော် အတုခိုးမိတာတစ်ခုက ဘလော့ဂ်ဖတ်တဲ့ အလေ့ အကျင့်လေးပါ။ မနိုင်က အလုပ်အားရင် ဘလော့ဂ်ဖတ်ပြီး မှတ်သားလေ့ရှိပါတယ်။ ပြီးရင် ပြန်လည်ဝေမျှ တတ်ပါသေးတယ်။ မနိုင်ကြောင့်ပဲ ကျွန်တော်လည်း ဘလော့ဂ်ဖတ်ရတာ၊ ဘလော့ဂ်လည်ရတာ ၀ါသနာပါပြီး အလုပ်က ပိုမအားတော့တာပါပဲ။ အေးချမ်းစွာ နေထိုင်တတ်တဲ့ အစ်မတစ်ယောက်ကို ချစ်ခဲ့ရပါတယ်။

မသီရိ - ကျွန်တော့်ရဲ့ နေပုံထိုင်ပုံ၊ ပြောဆိုဆက်ဆံပုံတွေနဲ့ ရှောင်ရန် ဆောင်ရန်တွေကို အမြဲသွန်သင်ပေးတဲ့ အစ်မတစ်ယောက်ပါ။ ညီမလေးရေ ဒီလိုပြောတာ မသင့်တော်ဘူး။ နောက်ဆိုရင် ဘယ်လိုလေးပြောရင် ပိုကောင်းတယ် စသည်ဖြင့် နားဝင်အောင် ပြောပြီး ကျွန်တော့်လူမှုဆက်ဆံရေးကို ထိန်းပေးတဲ့ အစ်မပါ။ ကျွန်တော်လည်း မသီရိ ပြောတာတွေကို လိုက်နာပါတယ်။ တစ်ခုရှိတာက မသီရိက အပြောအဆိုကောင်းတဲ့ အထဲမှာ အသံလေးကလည်း တော်တော် ချိုသာနူးညံ့ပါတယ်။ ကျွန်တော် ချစ်ရတဲ့ အစ်မတစ်ယောက်ဆိုလည်း မမှားပါဘူး။

မ၀ါ နဲ့ မဝေမြိုင် - ကျွန်တော်ကို အလှပြင်တတ်အောင် သင်ပေးတဲ့ အစ်မတွေပါ။ ဒီ ၂၀၀၉ ခုနှစ်နောက်ပိုင်းမှာ ကျွန်တော် တော်တော်ကလေး အလှပြင်တတ်လာသလို နည်းနည်းလေးလည်း ပိုလှလာတယ်လို့ ပြောကြ ပါတယ်။ (ပြောမယ့်သူမရှိလိုပ ကိုယ့်ဘာသာပြောတာပါ)။ ကျွန်တော် အလှပြင်တာနဲ့ ပတ်သက်လာရင် ဒီအစ်မတွေကို မေးမိ ပြောမိ သတိရမိပါတယ်။

ကိုကောင်းနဲ့ ကိုဖိုးချစ် - ကျွန်တော်တို့ဌာနရဲ့ ရှားရှားပါးပါး အမျိုးသားလေးတွေပါ။ ကျွန်တော့်အစ်ကိုတွေက စိတ်သဘောထားအရမ်းကောင်းပါတယ်။ ကျွန်တော်ဆိုရင် ကွန်ပျူတာ တစ်ခုခုဖြစ်လို့ သုံးလို့အဆင်မပြေဘူး ဆိုတာနဲ့ အားမနာတမ်း ပြင်ပေးဖို့ အကူအညီတောင်းတတ်ပါတယ်။ အစ်ကိုတွေကလည်း မငြီးမငြူ ကူညီတတ် ပါတယ်။ ကိုဖိုးချစ်ဆီမှာ သိမ်းထားတဲ့ မှတ်တမ်းမှတ်ရာတွေလည်း များလှလို့ ကျွန်တော်အလုပ်ထဲမှာ စာတမ်းရေးဖို့၊ မှီငြမ်းကိုးကားလိုရင် `ဘာပဲလိုလို ကိုဖိုးချစ်´လို့ သတ်မှတ်ထားပါတယ်။ နောက်လည်း အမြဲတောင်းဦးမှာ---

မမြတ်စု - ဧရာဝတီတိုင်းသားဖြစ်လို့ နယ်မြေစွဲ စိတ်နဲ့ ခင်မင်ရတဲ့ အစ်မပါ. ကျွန်တော်ကိုလည်း ဧရာတိုင်းသူ ပုသိမ်သူဆိုပြီး ခင်မင်ပါတယ်။

မဖြိုး - အချို့သော လုပ်ဖော်ကိုင်ဖက်တွေက တိုးဖီ၊ တိုးဖီလို့ ခေါ်ကြတယ်။ ကျွန်တော်ကတော့ ဘယ်တော့မှ ထိုအမည်ကို မခေါ်ခဲ့ပါ။ မဖြိုးနဲ့ ပတ်သက်ပြီး ထူးထူးခြားခြား ပြောစရာ မရှိပေမယ့် `အစ်မကြီးတော့ အမိအရာ´ ဆိုသကဲ့သို့ `ကြောက်ချစ်ကြီးပါ´။ မဖြိုးသိရင် ဒေါခွီးမှာ- ဒါကြောင့်သူမသိအောင် ဘလော့ဂ် တက်ရေးထားတာ။

မလဲ့ - မျက်နှာထားလေးကိုက ဖြူစင်ရိုးသားပြီး ကရုဏာမျက်နှာပိုင်ရှင်လေးပါ. မလဲ့ဆီက လိုချင်တာက သူ့ရဲ့ ဆံပင်အထူကြီးကိုပါ။

ဖူးပွင့် - အစ်မ မဟုတ်တော့ပါဘူး။ ရွာသာကြီးကတည်းက ဘော်ဘော်အရင်းကြီးပါ။ ကျွန်တော် သူ့ကို ဒီဆောင်းပါးလေးနဲ့ ရာထူးတိုးပေးလိုက်ပါတယ်။ သူက ကျွန်တော့်ရဲ့ `ရဲဘော်ရဲဘက်ကြီး´ တစ်ယောက်အဖြစ် ရာထူးတိုးပေးပါတယ်။ အရာရာကို ရှေ့ဆက် အတူတူလုပ်သွားဦးမှာပါ။

မီးမီး - သူလည်း သူငယ်ချင်း လုပ်ဖော်ကိုင်ဖက်ပါပဲ။ အော်လိုက် စိတ်ဆိုးလိုက် အတူတူလုပ်လိုက်နဲ့ တော်တော်လေးတွဲဖြစ်ပါတယ်။ မီးမီးက တော်တော်လေး ကြွကြွတက်တက် အလုပ်လုပ်တတ်ပါတယ်။ လုပ်ချင်ကိုင်ချင်တဲ့ စိတ်လေးလည်း ပြင်းထန်ပါတယ်။ ဒါပေမယ့် တခါတလေ ကျွန်တော် သူ့ကို မျက်စိနောက်၊ အထူးသဖြင့် နားနောက်ပါတယ်။ အခြားတော့ မဟုတ်ပါဘူး။ မီးမီးချွဲရင် ကျွန်တော် နားနောက်ပါတယ်။ တိန်-- တိန်--

ယဉ်မင်း - သူ့က စတွေ့တုန်းက `ကတုံး´ပါ။ ဒါကြောင့် အားလုံးက သူ့ကို `ကတုံး´ လို့ခေါ်ပါတယ်။ ခုတော့ ဆံပင်တွေ ပေါက်ပါပြီ။ သူကလည်း ကျွန်တော် ချစ်တဲ့သူတွေထဲမှာ ပါပါတယ်။ ကျွန်တော်ကြိုက်တဲ့ သီချင်းလေးတွေ မငြီးမငြူစုပေးတတ်လို့ပါ။ သူကလည်း သီချင်းကို ရူးသွပ်သူ တစ်ယောက်ဖြစ်ပါတယ်။

ဇင်မင်းဆွေ၊ ခိုင်စိုးနဲ့ မို့မို့ -- သူတို့တွေလည်း ကျွန်တော် ခင်တဲ့သူတွေပါ။ ကျွန်တော် သူတို့ဆီက လိုချင်တာရှိရင် အတင်းအဓမ္မသွားယူပြီး ဗိုလ်ကျတတ်ပါတယ်။ သူတို့ကလည်း မငြီးမငြူပေးရှာပါတယ်။ မို့မို့ကတော့ ကျွန်တော့်လက်သည်းလေးတွေကို လှသွားအောင် လက်သည်းနီလှလှလေး ဆိုးပေးတတ်ပါတယ်။ ဒါကြောင့်လည်း သူတို့တွေကို ချစ်မိပါတယ်။

မကြေး - ကျွန်တော် မကြေးကို ချစ်ပါတယ်။ အကြောင်းပြချက်က သူက ရာနှုန်းပြည့်ကို ချစ်ခင်လို့ပါ။

မသဇင် - ကျွန်တော်ကို ဖတ်သင့် နားထောင်သင့်တဲ့ ဆုံးမစာတွေကို ပြောပြ၊ ပေးဖတ်တတ်သူပါ။ အစ်မက အသံလည်း အတော်ကောင်းပါတယ်။ တခါတလေ အစ်မ အသံသွင်းထားတာလေးတွေကို ကျွန်တော်ကို ပေးနားထောင်တတ်ပါတယ်။ အစ်မအသံက အတော်လေး ကရုဏာသံပါတော့ နားထောင်ရတာ အေးချမ်းပါတယ်။

မချို - ဘာသာရေးကို လိုက်စားတဲ့ အစ်မတစ်ယောက်ပါ။ ရင်းနှီးချစ်ခင်ပါတယ်။

ဒီပိုစ့်လေးက သုံးနှစ်ပြည့်တော့မယ့် လုပ်သက်ကို ကြိုဆိုရင်း ချစ်ခဲ့ရသူများကို မှတ်တမ်းတင်ရခြင်းဖြစ်ပါတယ်။ အားလုံးကို ကျေးဇူးတင်ပါတယ်။