2009 Diary

၂၀၀၉ကို နှုတ်ဆက်လို့ ၂၀၁၀ ကို ကြိုဆိုတော့မယ့်အချိန်မှာ ၂၀၀၉ရဲ့ မှတ်တမ်းလေးတစ်ခုကို ဘလော့ စာမျက်နှာလေး ပေါ်မှာ ဖန်တီး ဖြစ်ခဲ့ပါတယ်။ ဒီလို diary ရေးဖို့ကို ကိုဇီးရိုးရဲ့ ဘလော့ကို သွားလည်ပြီးတော့ စိတ်ကူးလေးရခဲ့တာပါ။ လူတိုင်းအတွက် နှစ်တစ်နှစ်စီရဲ့ ကုန်ဆုံးမှုတွေမှာ ဘာတွေ လုပ်ဖြစ်လို့ ဘာတွေ မလုပ်ဖြစ်သေးတာလဲ။ ဘာလေးတွေ လုပ်ချင်နေသေးတာလဲ စသည်ဖြင့် မိမိရဲ့ ကုန်ဆုံးသွားတဲ့ အချိန်လေး တွေကို ပြန်လည် ဆန်းစစ်ထားတာ ဆိုရင်လည်း မမှားပါဘူး။ လူတိုင်းရေးသင့်တဲ့ ပိုစ့်တစ်ခုဖြစ်တယ် လို့လည်း ခံစားမိပါတယ်။ (အောက်မှာ ခပ်များများလေး tag လိုက်ပါဦး မယ်။ ရေးလရော့ --- တထောကြီး)

စတင်ပါပြီ ၂၀၀၉ ဒိုင်ယာရီ ----

ဇန်န၀ါရီ - ၂၀၀၉ ရဲ့ ပထမဆုံးလမှာ မှတ်မှတ်ရရ အလုပ်တွေ များနေရပါတယ်။ ဘာတွေ လုပ်နေရလဲဆိုတော့ Capacity Building သင်တန်းတစ်ခုအတွက် လုပ်ကိုင်နေရင်း သင်ခန်းစာတွေကိုလည်း ကောင်းမွန်အောင် ပြင်ဆင်နေရင်းဆိုတော့ အလုပ်များပါတယ်။ ဒီသင်တန်းလေးကို ၂၀၀၈ ဇွန်လမှာ စတင်ဖြစ်ပြီး သက်တမ်း ခြောက်လလောက်ကြာတဲ့အခါမှာ အတော်လေးလည်း အရှိန်ရလာတော့ တစ်ပတ်ရက်တို သင်တန်းလေးကနေ နှစ်လသင်တန်းအဖြစ် ပြုလုပ်နေတဲ့ အချိန်ဖြစ်ပါတယ်။ ပြီးတော့ လာမယ့် ဇွန်လမှာ ဗီယက်နမ်မှာ သွားဖတ် ရမယ့် ဆင်းရဲမွဲတေမှု လျော့ချရေးနှင့် လူမှုဖူလုံရေး စာတမ်းခေါင်းစဉ်နဲ့ ပတ်သက်ပြီး စတင်ပြီး အလုပ်ရှုပ် နေရတဲ့အချိန်လည်း ဖြစ်ပါတယ်။ ဒါတောင် လက်တွေ့စီးပွားရေး သီအိုရီကို ခိုင်းရင်း သင်ပေးတဲ့ ကိုဇီးရိုးရဲ့ ဖိုးဝကို မသွားရတော့လို့ပါ။ နို့မို့ဆို လူလည်း မေခြောက်ဖုံက အမေခေါ်ရလောက်အောင် ဆံပင်တွေဖြူသွား နိုင်ပါတယ်။ ကိုဇီးရိုးရဲ့ ခပ်ပြင်းပြင်း drive တွေကြောင့် ကျွန်တော်လည်း တော်တော်လေး တိုးတက်ခဲ့ရပါတယ်။

ဖေဖော်ဝါရီ - ထုံးစံအတိုင်း အလုပ်တွေ ရှုပ်ကောင်းနေဆဲပါ။ ဒီလမှာတော့ ကျွန်တော် အကြံအစည်တစ်ခုကို ဆင်ကြံ ကြိတ်ကြံ နေမိပါတယ်။ အဲဒါကတော့ ရန်ကုန်ပြောင်းရွှေ့ အခြေချရေးဆိုတဲ့ ကျွန်တော်ရဲ့ မဟာရည်မှန်းချက်ကြီးကို အကောင်အထည် ဖော်နိုင်ဖို့အတွက် ပထမဆုံးလှုပ်ရှားမှုအဖြစ် ကျွန်တော့် ညီမလေး ရာနှုန်းပြည့်ကို ရန်ကုန်ခေါ်ထားဖို့ ဆုံးဖြတ်ခဲ့တာပါပဲ။ ဆင်ကြံလို့ ပြောရ တာတော့ မည်သူ့ကိုမှ ဖွင့်တိုင်ပင်ခြင်း လည်း မရှိဘဲနဲ့ သူ့ကို ကျွန်တော် အကုန်လုံးတာဝန်ယူပြီး ဒီမှာခေါ်ထားနိုင်ဖို့ တစ်ယောက်တည်း ကြိတ်ကြိုးစား နေတာပါ။ ကျွန်တော်တို့လို နယ်မြို့လေးက လာရတဲ့သူတွေအတွက် ရန်ကုန်စရိတ်က ကြီးလွန်းလှပါတယ်။ ကျောချဖို့ တစ်နေရာအတွက် အတော်စဉ်းစားရပါတယ်။ မိန်းကလေးတွေ ဖြစ်တဲ့အတွက်လည်း လုံခြုံရေးက လည်း စဉ်းစားရသေးတယ် ကလား။ အတော် ခေါင်းခြောက်ခဲ့ရပါတယ်။ ကျွန်တော်တစ်ယောက်တည်းတုန်းက အဒေါ်အိမ်မှာ ကပ်နေ၊ ကပ်စား ကပ်မြောင်လုပ်ပြီး ရှာလို့ ရတဲ့ ပိုက်ပိုက်တွေ အကုန်စုခဲ့တာလေ။ သူ့ကို ခေါ်တော့မယ်ဆိုတော့ စား၊ ၀တ်၊ နေရေး အကုန်လုံး ထည့်ပြီး တွက်ချက်စဉ်းစားရပြန်ပါပြီ။

မတ်လ - အလုပ်ရှုပ်မှုတွေ အဆုံးမသတ်သေးပါဘူး။ ဗီယက်နမ်သွားပြီး စာတမ်းဖတ်ပွဲကလည်း တော်တော် လေး လုပ်နေရပြီဖြစ်ပါတယ်။ အချက်အလက်တွေစုရ။ လူကယ်ပြန်ပြေးရ။ အမျိုးသမီးရေးရာ ပြေးရ။ မိခင်နဲ့ ကလေးလည်း ပြေးရ။ ဟိုပြေး ဒီပြေးနဲ့ အချက်အလက်တွေ တောင်း။ စာတမ်းကိုရေး။ စာတမ်းကြီးကြပ်သူကို ပို့။ သူကမကြိုက်လို့ ပြန်ပြင်ရ။ သူပြောတာ ကိုယ့်ဘက်က လက်မခံနိုင်လို့ ငြင်းရ. သတ်ရနဲ့ အတော်ကို အလုပ်ရှုပ်ပါတယ်။ စာတမ်း ကြီးကြပ်တဲ့သူက ဗိုလ်မသာဆိုတယ် အချို့နေရာတွေမှာ မြန်မာပြည်ရဲ့ အချက်အလက် တွေ ကျွန်တော့်ထက်တောင် ပိုသိပါသေးတယ်။ သူ့နာမည်က Kate Carrolတဲ့။ ActionAid ရဲ့ Knowledge Initiative ကပါ။ အရမ်းကိုတော်ပါတယ်။ ဒီကြားထဲ တယ်လီကွန့်ဖရင့်ကလည်း နှိပ်စက်သေးတယ်။ အုပ်စုလိုက် တဲ့။ တစ်ယောက်ချင်းတဲ့။ မြန်မာပြည်က ဆိုရင် ဖဲ့မယ်ဆိုပြီး ဆုံးဖြတ်ထားသလား မသိလောက်အောင် တော်တော် ကပ်သီးကပ်သပ် မေးခွန်းတွေ မေးပါတယ်။ ကျွန်တော်ကလည်း official စာအုပ်ကြီးတွေ ရှေ့ချပြီး ပြန်ဖြီးနဲ့ တော်တော့်ကို ခေါင်းခြောက်ရပါတယ်။ နောက်မှပဲ အသေးစိတ်ဆွေးနွေးပါတော့မယ်။ မတ်လရဲ့ ၂၀ရက်နေ့မှာ ရာနှုန်းပြည့်ကို ငါတာဝန်ယူတယ်။ နင်လာခဲ့တော့ ဆိုပြီး ခပ်တည်တည် လှမ်းခေါ်လိုက်ပါတယ်။ အဲဒီမှာ ပိုပြီး ချာလပတ်ရမ်းတော့တာပဲ။ မတ်လထဲမှာ စွန့်စွန့်စားစားဆုံးဖြတ်ချက် တစ်ခုလည်းချဖြစ်ပါ သေးတယ်။ ဒီနှစ် ၂၀၀၉ ကစလို့ ဆယ်တန်းဂိုက်မလုပ်တော့ဘူးလို့ ဆုံးဖြတ်ခဲ့တာပါ။ ၂၀၀၀ ခုနှစ်ကတည်းက စာသင်ခဲ့လို့ အဲဒီအပိုင်းမှာ အတော်ကြေညက် နေပေမယ့်လည်း ဆယ်တန်းမှာတင် အဆုံးမသတ်နိုင်လို့ ၀င်ငွေ ကောင်းတဲ့ ဒီအလုပ်ကို ရူးမိုက်စွာ စွန့်လွှတ်ခဲ့ပါတယ်။ ၂၀၀၈မှာ သင်ပေးနေတဲ့ စာသင်သားတွေကိုလည်း `ဒီနှစ်မှာ အစွမ်းကုန်ကြိုးစားပြီး အောင် အောင်ဖြေ။ နောင်နှစ်လုံးဝ မသင်တော့ဘူး။ အောင်လည်း မဆက်သွယ်နဲ့။ ရှုံးလည်း မဆက်သွယ်နဲ့´ လို့ ခြိမ်းခြောက်ပြီး အဓမ္မစာကြိုးစားခိုင်းခဲ့ပါတယ်။ ပြောတဲ့အတိုင်း လုပ်တတ်လို့ သူတို့လည်း ကြောက်ကြောက်နဲ့ ကြိုးစားရှာပါတယ်။ အားလုံးပဲ စာမေးပွဲကို ကောင်းမွန်စွာ ဖြေနိုင် ခဲ့ပါတယ်။ ပြီးပြန်ပြီပေါ့ တစ်ဇာတ်လို့ သတ်မှတ်ခဲ့ပါတယ်။

ဧပြီလ - ၁ရက်နေ့မှာ ညီအစ်မနှစ်ယောက် အဒေါ်အိမ်ကနေ အဆောင်ကို ပြောင်းခဲ့တယ်။ တစ်ယောက် ကပ်စားရင် တော်သေးတယ်။ နှစ်ယောက်ဆိုတော့ အားနာလာလို့ ပြောင်းလိုက်ပါတယ်။ ဆင်မင်းဈေးနားကို ပြောင်းခဲ့တယ်။ အိမ်ထောင်အသစ်တည်သလိုပဲ။ အိုး၊ ခွက်၊ ပန်းကန်ကအစ အားလုံးကို လိုတော့တာပဲ။ လိုတာလေးတွေ ဖြည့်လိုက် နေလိုက်ရင်းနဲ့ တော်တော်ကို အလုပ်ရှုပ်ခဲ့ပါတယ်။ ဒီကြားထဲ စာတမ်းကိုလည်း လုံးပမ်းရသေးတယ်။ ဇွန်လဆန်းမှာ ဖတ်ရမယ့် စာတမ်းမို့ မေလလယ်မှာ လက်စသတ်ရပါတော့မယ်။ အဲဒီတော့ သမ၀ါယမကလုပ်တဲ့ Microfinance Program တစ်ခုမှာ သွားပြီး အင်တာဗျူးတွေလုပ်၊ ဒေတာတွေကောက်နဲ့ တစ်နေကုန် နေပူထဲမှာ အချိန်ကုန်ခဲ့ရပါတယ်။ ဒါအပြင် အဒေါ်အိမ်မှာ ဘာမှ မလုပ်ခဲ့ရတော့ ချက်ရေး ပြုတ်ရေး မကျွမ်းကျင်တာကြောင့် မီးလန့်လို့ ရပ်ကွက် ရုံးရောက်။ မီးသတ်မှာ ဒဏ်ကြေးဆောင်နဲ့ တော်တော် ရင်ထိတ်ခဲ့ရပါတယ်။ အိမ်ရှင်ကလည်း ရောက်ရောက်ချင်း ဆောက်နဲ့ထွင်းဆိုသလို ဖြစ်သွားလို့ လက်မခံချင် တော့ဘူးတဲ့။ တော်တော်လေးလည်း တောင်းပန်၊ ငိုပြလိုက်တော့ ဆက်နေလို့ ရသွားပါတယ်။ ကျွန်တော်လည်း ပြောင်းနိုင်ဖို့ ဆုံးဖြတ်လိုက်ပါတယ်။

မေလ - ထူးထူးခြားခြားတော့ မရှိပါဘူး။ အရှုပ်တွေပဲ ဆက်လုပ်ဖြစ်နေပါတယ်။ ရာနှုန်းပြည့်ကိုလည်း ရန်ကုန်နဲ့ ရင်းနှီးသွားအောင်၊ ရန်ကုန်အထာလေးတွေလည်း ညက်သွားအောင် သင်တန်းအချို့ တက်စေခဲ့ပါတယ်။ ဒီလတွေ အတွင်းမှာ ရာနှုန်းပြည့်က ရန်ကုန်ကို ရောက်စဆိုတော့ လွှတ်ကိုလည်တော့တာပဲ။ (သူက ဘယ်နေရာ မှာပဲ ဖြစ်ဖြစ် အပေါင်းအသင်း ပေါပါတယ်)။ ကျွန်တော်လည်း နေနှင့်ဦး ပေါ့။ ငါအားတော့မှာ lesson ပေးမယ် ဆိုပြီး တေးထားလိုက် ပါတယ်။ သူကလည်း တစ်ယောက်တည်းဆိုတော့ အားငယ်လို့ထင်ပါရဲ့။ ပုသိမ်က သူ့သူငယ်ချင်းတစ်ယောက်ကို အတူလာနေဖို့ စည်းရုံးတာ အဲဒီကလေးမလေးလည်း လာနေဖြစ်ပါတယ်။ ဘယ်နှယ့်ရှိစ။ နှစ်ယောက်ပေါင်းတော့ တော်တော့်ကို လောင်းကျော်သွား ပါတယ်။ ကျွန်တော်လည်း နေနှင့်ဦးလို့ ထပ်တေးထားလိုက်ပါတယ်။

ဇွန်လ - ဇွန်လ ၁ရက်နေ့မှာ ကျွန်တော့်ရဲ့ ပထမဆုံး ပြည်ပခရီးစဉ် စတင်ခဲ့ပါတယ်။ ထိုင်းနိုင်ငံကတဆင့် ဗီယက်နမ်ကို သွားခဲ့ပါတယ်။ ဗီယက်နမ်နိုင်ငံ ဟနွိုင်းမြို့ကို ညနေ ခြောက်နာရီခွဲလောက်မှာ လေယာဉ်ဆိုက် ပါတယ်။ ဗီဇာတွေလုပ်၊ လာကြိုတဲ့သူနဲ့အတူ အခြားနိုင်ငံက colleagues တွေကို စောင့်နဲ့ ဟိုတယ်ကို ၈နာရီခွဲလောက်မှ ရောက်ပါတယ်။ သတိပြုမိတာက ဟနွိုင်းက ရန်ကုန်နဲ့ တော်တော်လေး တူပါတယ်။ ကျွန်တော့် အခန်းဖော်က ကျူးဘားနိုင်ငံကပါ။ အသက်လေးဆယ်လောက်ရှိပါပြီ။ ဒီ field ထဲမှာ လုပ်နေတာ အတော်ကြာလို့ တော်တော်ကျွမ်းကျင်နေပါပြီ။ စာတမ်း ဖတ်ပြီး အခြားသော လေ့လာရေးများ၊ ဆွေးနွေးမှုများကို ပြုလုပ်ခဲ့ပြီး South-South Youth Meeting ရဲ့ Statement တစ်စောင်ကို ဆွေးနွေးပြီး အတည်ပြုခဲ့ပါတယ်။ ရန်ကုန်ပြန်ရောက်လာပြီးတော့ ထုံးစံအတိုင်း ကျွန်တော့်အလုပ်တွေ ဆက်လုပ်ဖြစ်ပါတယ်။ ပြန်ရောက်ပြီး ကိုဇီးရိုးနဲ့လည်းတွေ့ပြီး စကားတွေ ပြောဖြစ်ပါသေးတယ်။ ဒီလမှာတော့ ကျွန်တော်ငွေရေးကြေးရေး တော်တော် ကြပ်တည်းပါတယ်။ စာတမ်းက ဆုရတဲ့ပိုက်ဆံရယ်၊ ကျွန်တော်စုထားတဲ့ ပိုက်ဆံရယ်ပေါင်းပြီး အရမ်းလိုချင် နေတဲ့ ပစ္စည်းနှစ်ခုဝယ်ခဲ့ပါတယ်။ တစ်ခုက ASUS X 82Q Laptop ပါ။ နောက်တစ်ခုက Sony က Cyber Shot တစ်ခုပါ။ ပိုက်ပိုက်တွေက တက်တက်ကို ပြောင်သွားပါတယ်။ အပြန်ခရီးမှာတောင် သုံးစရာ မရှိတော့လို့ သုဝဏဘူမိလေဆိပ်မှာ Transit နားတုန်း အလကားပေးမြည်းတာတွေ လိုက်စားပြီး ဗိုက်ဖြည့်ခဲ့ရပါတယ်။

ဇူလိုင်လ - ထူးခြားဖြစ်စဉ်မရှိပါ။ သူများအကျိုးတွေ လိုက်ဆောင်ရင်း အရှုပ်တွေ လုပ်နေပါတယ်။ အလုပ်လုပ်တဲ့ လုပ်သက်ကလေး အတွင်းမှာ ခင်မင်မိတဲ့သူတွေလည်း အတော်များလာတဲ့အတွက် အဆက်အသွယ်လေးလည်း နည်းနည်း ရလာပါတယ်။ အလုပ်ရှာတဲ့ သူငယ်ချင်းတွေအတွက် နီးစပ်ရာမှာ ဟိုချိတ်၊ ဒီချိတ်လုပ်ပေးနေပါတယ်။ အဲ နောက်တစ်ခုက ရာနှုန်းပြည့်ကိုလည်း စပြီး ကျပ်နေပါတယ်။

သြဂုတ်လ - ကျွန်တော်နဲ့အတူ အလုပ်လုပ်တဲ့ သူငယ်ချင်းတစ်ယောက် အလုပ်ထွက်သွားပါတယ်။ ကျွန်တော့်ကို ဒီလိုတော်လာအောင် လေ့ကျင့်ပေးခဲ့တဲ့ ကျွန်တော့်ဆရာ ဒေါက်တာဝါ၀ါမောင်လည်း ရာထူးတိုးပြီး နေပြည်တော် ကို ပြောင်းရွှေ့ခဲ့ရပါတယ်။ တော်တော်တော့ ခံစားရပါတယ်။ တီချယ်က ပြောပါတယ်။ ညည်းဘာမှ ကြောက်မနေနဲ့။ ဆက်လုပ်တဲ့။ ငါလည်း နေပြည်တော်ကနေ ဆက်သွယ်နေမယ်တဲ့။ တီချယ်က ပြောတဲ့ အတိုင်းကို လုပ်ပါတယ်။ ယနေ့အထိ ဆက်သွယ်ပြီး ကျွန်တော် လေ့လာဖို့တွေ ပေးနေတုန်းပါ။ ကျွန်တော်လည်း လက်ရှိလုပ်နေတဲ့ အလုပ်က ထွက်ဖို့ စိတ်ကူးခဲ့ပေမယ့် ယနေ့အထိ မအောင်မြင်သေးပါ။ ကျွန်တော်အတွက် ကြားသုံးကြား ၀င်မိလို့ နောက်ပိုင်းမှာ စိတ်ညစ်ရမယ့် ကြားတွေထဲလည်း ၀င်ဖြစ်ခဲ့ပါသေးတယ်။ ဒီလထဲမှာ စိတ်ရှုပ်လို့ ကိုဇီးရိုးကို ခေါ်ပြီး ခေါင်းပူပါသေးတယ်။ ကျွန်တော့်အကိုက မုန့်လိုက်ကျွေးပြီး စိတ်ညစ်ဖြေ ပေးပါတယ်။ ဒီလထဲမှာပဲ ကျွန်တော်တို့ အိမ်ပြောင်းခဲ့ပါတယ်။ ဟံသာရိပ်မွန်ထဲက အခန်းတစ်ခန်းကို ငှားနေ ဖြစ်တာပါ. အဆောင်နေတာထက် အများကြီး ပိုလွတ်လပ်သွားပါတယ်။ ဒီလိုနဲ့ သြဂုတ်လ ကုန်ခဲ့ရပါတယ်။

စက်တင်ဘာလ - ဒီလကစပြီး ပိုက်ပိုက်စုတော့လို့ သူငယ်ချင်းတစ်ယောက်က လှမ်းပြီးသတိပေးပါတယ်။ ၂၀၀၉ ကုန်တဲ့အထိ အခင်ဆုံး၊ အချစ်ဆုံး သူငယ်ချင်း လေးယောက်ဆက်တိုက် မင်္ဂလာဆောင်ပါတယ်။ တော်တော်လေး ကုန်သွားပါတယ်။ ဒီလထဲမှာ မောင်ကောင်းရဲ့ အဆက်အသွယ်နဲ့ STI မှာ Lecturer လုပ်ဖို့ ဆက်သွယ်ဖြစ်ပါတယ်။ တီချယ်ကြီး ဒေါ်လှမြင့်က ကျွန်တော့်ကို Taxi ပေါ်မှာ အင်တာဗျူးပါတယ်။ ပြီးတော့ We will let you know လို့ ပြောခဲ့ပါတယ်။ STI မှာ Warehouse Management အတန်းကို သင်ခွင့်ရ ပါတယ်။ အတန်းက ကြီးတော့ သင်တန်းသားတွေကလည်း လက်တွေ့မှာ တော်တော် ကျွမ်းကျင်နေတော့ သူတို့ကို သင်ဖို့ အတွက် ကျွန်တော်စာတွေ အများကြီး ဖတ်ခဲ့ရပါတယ်။ အင်တာနက်ထဲလည်း တော်တော် ရှာဖွေခဲ့ပါတယ်။ You Tube ကိုလည်း ကျွမ်းကျွမ်း ကျင်ကျင် Download လုပ်နိုင်သွားပါတယ်။ သူများနိုင်ငံတွေရဲ့ Warehouse တွေကိုလည်း သိခွင့်ရခဲ့ပါတယ်။ STI က ကျွန်တော့် အတွက်တော့ Good Playing Ground တစ်ခုဖြစ်ခဲ့ ပါတယ်။ စိတ်လှုပ်ရှားဖို့လည်း ကောင်းသလို ပျော်ဖို့လည်း ကောင်းပါတယ်။ ဒီလတွေထဲမှာ Regent Business Academy မှာ စာသင်ဖို့လည်း ချိတ်နေပါပြီ။ ဒီလထဲမှာ ရာနှုန်းပြည့်လည်း MRTV 4 က TV Guide မှာ အလုပ်ရသွားပါတယ်။ ကိုအတီးရဲ့ လက်အောက်မှာ လုပ်ရတာပါ။ သူလည်း အဲဒီမှာ ပျော်နေပါတယ်။ ကျွန်တော် လည်း နည်းနည်းတော့ စိတ်သက်သာသွားပါတယ်။

အောက်တိုဘာလ - အတန်းသစ်တွေမှာ စာသင်ဖို့တွေ လုံးပမ်းနေပါတယ်။ သင်ခန်းစာတွေ ကိုယ်တိုင်ပြင် ရေးဆွဲပါတယ်။ ဒီကြားထဲ On Job Training တဲ့။ Executive Level တဲ့. တီချယ်ဝါခိုင်းလို့ လုပ်ခဲ့ရပါတယ်. တော်တော်လေးတော့ စာဖတ်ဖြစ်ပါတယ်။ ပြီးတော့ ရွှေပါရမီ အထူးကုဆေးခန်းက ၀န်ထမ်းတွေကို Capacity Building Training သွားဖြစ်ခဲ့ပါတယ်။ အချို့မသိတာတွေကို ကိုဇီးရိုးကို လှမ်းပြီး မေးပါတယ်။ မငြီးမငြူဖြေ ပေးပါတယ်။ အောက်တိုဘာလည်း လုံးချာလည်ရင်း ကုန်သွားပါတယ်။

နိုဝင်ဘာ - နိုဝင်ဘာလည်း ဒီလိုပါပဲ. စာသင်ရင်းပဲ ကုန်ဆုံးခဲ့ပါတယ်။ ကြုံတုန်းကြွားဖို့ ရှိပါတယ်။ ကိုဇီးရိုးဆီက အီးဘွတ် ၈၀၀ ကျော်ကို မုန့်နဲ့ လဲခဲ့ပါတယ်။ တော်တော်လေး အထောက်အကူရပါတယ်။ လိုချင်တဲ့သူရှိရင် ဆက်သွယ်ပါ. အမြတ်ရရင် မုန့်နဲ့ ထပ်လဲပါ့မယ်။

ဒီဇင်ဘာ - ဒီဇင်ဘာလဆန်းမှာ ခရီးတစ်ခုသွားမယ်လို့ ဆုံးဖြတ်ခဲ့ပါတယ်။ ပုသိမ်က မိဘတွေကို ခေါ်ပြီး ကျိုက်ထီးရိုး ဓမ္မခရီးစဉ်ကို ကျွန်တော်ပို့ဖြစ်ပါတယ်။ ကျွန်တော့်ဘ၀မှာ မိသားစုလိုက်သွားဖြစ်ခဲ့တဲ့ ပထမဆုံး သော ခရီးလည်း ဖြစ်ပါတယ်။ ပျော်စရာ ဆိုတာထက် စိတ်ချမ်းမြေ့ခဲ့ရတာက ပိုပါတယ်။ မိဘနှစ်ပါး ကျိုက်ထီးရိုး ရင်ပြင်တော်ပေါ်မှာ ကြည်ကြည်နူးနူးနဲ့ ကုသိုလ်ယူနေတဲ့ပုံတွေက မျက်လုံးထဲက မထွက်နိုင်အောင်ပါ။ သန်းဌေးနဲ့ရောင်းရင်း ဘုရားဖူးကား ကလည်း တော်တော် ၀န်ဆောင်မှုကောင်းပါတယ်။ ပျော်စရာ ခရီးစဉ် တစ်ခုပါ။ ရန်ကုန်ပြန်ရောက်တော့ မေကြီးကို ဆေးခန်းပြခဲ့ရပါတယ်။ ပုသိမ်မှာ ချော်လဲတာကို ဆေးခန်းမပြဘဲနဲ့ ထားခဲ့တာ တစ်လခွဲလောက်ရှိပါတယ်။ ဒီရောက်တော့ အရွတ်ပြဲတယ်။ သွေးယိုတယ်ဆိုပြီး ခွဲစိတ်မှု လုပ်ရမယ် ဆိုလို့ လန့်ခဲ့ရပါတယ်။ နောက်တော့ ၈လမ်းက ဒေါက်တာမင်းဇော် ဆေးခန်းမှာ သွားပြတော့ အဆင်ပြေသွား ပါတယ်။ ဒီဇင်ဘာ ၂၀မှာ MyanmarING ရဲ့ 2nd Camp မှာ The Role of ICT in Povert Reduction, Necessary But Insufficient ဆိုတဲ့ ခေါင်းစဉ်နဲ့ စာတမ်းဖတ်ဖြစ်ခဲ့ပါတယ်။ ဒီဇင်ဘာ ၂၂ရက်နေ့မှာ ဆုံးဖြတ်ချက်တစ်ခုကို ပြတ်ပြတ်သားသားချလို့ လုပ်ဖြစ်ခဲ့တာရှိပါတယ်။ ခေါင်းလည်းပူပါတယ်။ စိတ်လည်း ပူပါတယ်။ ဘာလဲ ဆိုတာတော့ ၂၀၁၀ ဒိုင်ယာရီမှာ ဖတ်ရှုပါ။ ခရစ်စမတ်အားလပ်ရက်တွေမှာ အိမ်မှာ နားလို့ အားမွေးပါတယ်။ ဘလော့ရေးဖို့ စာစုပါတယ်။ ဘုရား၊ တရားလုပ်ဖြစ်ပါတယ်။ ခေါင်းပူရမှာတွေကို ကြိုတင် အားဖြည့်ပါတယ်။

ဒီလိုနဲ့ ဒီဇင်ဘာလည်း ကုန်ဆုံးခဲ့လို့ ၂၀၁၀ ရောက်ပါပြီ၊ ၂၀၀၉ ကို ပြန်လည်သုံးသပ်ရင် လုပ်ဖြစ်ခဲ့တာတွေ ရှိပေမယ့် စိတ်ကျေနပ်မှုတော့ မရခဲ့ပါဘူး။ လုပ်ခဲ့ရတာတွေ၊ ဖတ်ဖြစ်ခဲ့တဲ့စာတွေ များပေမယ့် မမှတ်မိသလို ဖြစ်နေပါတယ်။ ၂၀၀၉ ထဲမှာ ဝေးသွားပြီ ဖြစ်တဲ့ သူငယ်ချင်းအချို့နဲ့ အဆက်အသွယ် ပြန်ရပါတယ် (ဖြူ၊ ဧပရယ်၊ ဘေးဘေး၊ ယဉ်ယဉ် အများကြီးပဲ ပြန်ဆုံပါတယ်) ။ ပျော်စရာ ကောင်းပါတယ်။ ဘာပဲဖြစ်ဖြစ် လာမယ့် ၂၀၁၀ အတွက် အားမွေးရင်း ၂၀၀၉ ကို နှုတ်ဆက်လိုက်ပါတယ်။

တကယ်ခင်လို့ tag လိုက်ပါတယ်။ ရေးပေတော့ ၂၀၀၉ မကုန်ခင် ---
၁။ ကိုဇီးရိုး
၂။ ပန်းပွင့်
၃။ ဖြူစင်သူ
၎။ ချစ်အိမ်ငယ်
၅။ မသီရိ